لە كۆبوونەوەی لەگەڵ ژمارەیەك لە ریفۆرمخوازانی كورد له‌ کوردستانی ئێران، محه‌ممه‌د خاته‌می سەرۆك کۆماری پێشوو و دیارترین که‌سی سه‌ر به‌ ره‌وتی ریفۆرمخواز له‌ نیزامی کۆماری ئیسلامی ئێران دا ئەوەی ئاشكرا كرد كە جارێكی دیكە خۆی بۆ بەدەستهێنانەوەی پۆستی سەرۆكی وڵاتەكەی دەپاڵێوێتەوە. له‌و کۆبوونه‌وه‌یه‌دا که‌ نیزیک به‌ دووسه‌د که‌س له‌ ئیسلاح ته‌ڵه‌بانی کورد به‌شدار بوون، خاتەمی ئاماژەی به‌وه‌دا كە هەموو هەوڵێكی بۆ بەدیهێنانی چاكسازی لە وڵاتدا دەخاتە گەڕ و یەكێك لە كارە گرنگەكانی كە بانگەشەی بۆ كرد باشكردنی پێوەندییەكانی وڵاتەكەی لەگەڵ وڵاتانی ئەورووپا و ئەمەریكادا دەبێت.

بەپێی هەواڵێكی ئاژانسی "ڕۆیتەرز"، خاتەمی ڕۆژی یەكشەممە، 16ی رێبه‌ندان، لە میانەی كۆبوونەوەی لەگەڵ ژماره‌یه‌ک له‌ ئیسلاح ته‌ڵه‌بانی كورددا، ئاشكرای كرد كە خۆی بۆ هەڵبژاردنەكانی سەرۆكایەتی به‌هاری داهاتووی وڵاتەكەی كاندید دەكاتەوە و بانگەشەی ئەوەی كرد كە: "هەوڵ دەدەم چاكسازی لە سیاسەتەكانی دەرەوەی وڵاتەكەمدا بكەم و لە هەمان كاتیشدا هەوڵی ده‌سته‌به‌ركردنی ماف و ئازادییەكانی نەتەوە جیاجیاكانی وڵاتەكەم دەدەم". به‌ پێی راپۆرتێک که‌ له‌ بڵاوکراوه‌ی هه‌ولێر پۆست دا له‌م باره‌وه‌ بڵاو کراوه‌ته‌وه‌، زۆرێك لە چاودێرانی سیاسی پێیان وایە هۆكاری خۆكاندیدكردنی خاتەمی بۆ دروستبوونی ئەو كێشە و تەنگوچەڵەمانە دەگەڕێتەوە كە لەوادەی سەرۆكایەتی ئەحمەدینەژاد دا ئێرانی پێدا تێپەڕیوە و خاتەمی دەیەوێت وڵاتەكەی لەو بارودۆخە دەرباز بكات.

ماڵپه‌ری "ئەلعەرەبییە نێت" له‌ باره‌ی ئه‌م ده‌سپێکه‌ی خاته‌می بۆ کاندیدای سه‌رۆک کۆماری ئاماژەی دا كە ناوبراو بە كوردەكانی به‌شدار له‌ کۆبوونه‌وه‌که‌ی ڕاگەیاندووە، كە مەبەستی بەشداریكردنی لە هەڵبژاردنەكان سەرەڕای بەدەستهێنانەوەی پۆستی سەرۆكایەتی، خزمەتكردنی وڵات و شكستپێهێنانی ڕكابەرەكەی (ئەحمەدینەژاد)ـە. هاوكات لە یەكێك لە پێگە ئینتەرنێتییەكاندا بابەتێك بە ناوونیشانی "لە كۆتایدا (خاتەمی) لە دەرگەی كوردەكانەوە هاتە نێو بازنەی هەڵبژرادنەكانەوە" بڵاو كراوەتەوە و، تێیدا ڕوون كراوەتەوە كە (خاتەمی) دەیەوێت لە ڕێگەی بەدەستهێنانی دەنگی كوردەكان و نەتەوەكانی دیكەی ئێرانەوە زامنی بردنەوەی پۆستی سەرۆكایەتی بۆ خۆی بكات و ئەگەری ئەوەیش هەیە که‌ ئێرانیش هاوشێوەی توركیا، كرانەوەی زیاتری پێوەندی و دابینكردنی مافەكان بە ڕووی كوردەكاندا بكاتەوە. (خاتەمی) ڕای گەیاندبوو: "ئاسایشی وڵات بە دەست نایەت تا ئەو كاتەی هاووڵاتیان لە ڕەفتاری كاربەدەستان ڕازی نەبن، بۆ بەدیهێنانی ئەم ئامانجەیش، پێویستە مافی هەموو ئێرانییەكان بێ جیاوازی فەراهەم بكەین".

هه‌ولێر پۆست له‌ کۆتایی راپۆرته‌که‌ی دا ده‌نووسێ: بەدەستهێنانی دەنگی نەتەوە جیاوازەكان، زامنی سەركەوتنی (خاتەمی) دەبێت. هاوكات شارەزایانی بواری سەرژمێریی دانیشتووان، پێیان وایە نەتەوە جیاوازەكانی وەكوو كورد، تورك، ئازەربایجانی، عەرەبە ئەهوازییەكان، بەلوچ و لوڕەكان (كوردە فەیلییەكان) نزیكەی 55% _ 60%ـی دانیشتووانی ئێران پێك دەهێنن و، بەدەستهێنانی دەنگی ئەوانە، زامنی سەركەوتنی (خاتەمی) دەكات. پێشتر و لە هەڵبژاردنەكانی 1997 و 2001ـدا (خاتەمی) توانیبووی ڕێژەیەكی زۆری دەنگەكانی كورد و نەتەوەكانی دیكەی ئێران بە دەست بهێنێت، بەڵام ئەوەی لێرەدا جێگەی پرسیارە ئەوەیە، كە ئایا (خاتەمی) جارێكی دیكە دەتوانێ بە دەنگی ئەم نەتەوانە پۆستی سەرۆكایەتی وەربگرێتەوە یاخود نا؟.

 له‌ راگه‌یه‌ندراوێکدا کۆمه‌ڵیک له‌ پێشمه‌رگه‌ دێرینه‌کانی حیزبی دێموکرات راگه‌یاندنی دامه‌زرانی "کۆمه‌ڵه‌ی پێشمه‌رگه‌ دێرینه‌کانی دێموکرات" راده‌گه‌یه‌نن و بۆ ئه‌م مه‌به‌سته‌ش داوا له‌ هه‌موو ئه‌وانه‌ی که‌ پێشتر له‌ ریزه‌کانی ئه‌و حیزبه‌دا خه‌باتیان کردووه‌ بۆ ئه‌ندام بوون له‌ رێکخراوه‌که‌یاندا بانگهێشت ده‌که‌ن.
له‌ راگه‌یه‌ندراوه‌که‌دا وێڕای پیرۆزبایی رۆژی پێشمه‌رگه‌ی کوردستان له‌ سه‌رجه‌م ئه‌و که‌سانه‌ی له‌ ریزه‌کانی هێزی پێشمه‌رگه‌دا بۆ ئازادیی نه‌ته‌وه‌که‌یان خه‌بات ده‌که‌ن، هاتووه‌ که‌ "بۆ رێزلێنان له خه‌بات و تێكۆشانی پاریزه رانی نیشتمان، ئیمه پۆلێك له پێشمه‌رگه دێرینه‌کانی حیزب بریارمان دا كه له‌ رۆژی پیرۆزی 26ی سه‌رماوه‌ز، که‌ له‌ مێژه‌ له‌ لایه‌ن حیزبه‌که‌مانه‌وه‌ وه‌ک رۆژی پێشمه‌رگه‌ی کوردستان نێودێر کراوه‌، دامه‌زرانی کۆمه‌ڵه‌ی پێشمه‌رگه‌ دێرینه‌کانی دێموکرات رابگه‌یه‌نین."
نووسه‌رانی راگه‌یه‌ندراوه‌که‌ هه‌روه‌ها راده‌گه‌یه‌نن که‌ تا ئێستا توانیویانه‌ ره‌شنووسی پێڕه‌و و پڕۆگرامی ناوخۆی کۆمه‌ڵه‌که‌یان ئاماده‌ بکه‌ن و چاوه‌ڕوانن له‌ ده‌رفه‌تێکدا کۆ ببنه‌وه‌ و به‌ په‌سه‌ندی ئه‌ندامه‌کانیان بگه‌یه‌نن و ده‌سته‌ی به‌ڕێوه‌به‌ریی رێکخراوه‌که‌ هه‌ڵبژێرن.
له‌ کۆتایی راگه‌یه‌ندراوه‌که‌دا، دامه‌زرێنه‌رانی کۆمه‌ڵه‌ی پێشمه‌رگه‌ دێرینه‌کانی دێموکرات داوا له‌ هه‌موو ئه‌و که‌سانه‌ی که‌ لانیکه‌م دوو ساڵ له‌ ناو ریزه‌کانی هێزی پێشمه‌رگه‌ی حیزبی دێموکراتدا خه‌باتیان کردووه‌، ده‌که‌ن که‌ له‌ رێی ئه‌و مایله‌ی خواره‌وه‌ پێوه‌ندی به‌ دامه‌زرێنه‌رانی کۆمه‌ڵه‌که‌وه‌ بگرن. ئه‌وان هه‌روه‌ها راده‌گه‌یه‌نن که‌ "بڕوا بوون به‌ حیزبی دێموکراتی کوردستان و بنه‌ماکانی کۆماری کوردستان" مه‌رجی سه‌ره‌کیی ئه‌ندام بوون له‌ رێکخراوه‌که‌یانه‌.
شیاوی ئاماژه‌یه‌ که‌ ده‌سته‌ی دامه‌زرێنه‌ری "کۆمه‌ڵه‌ی پێشمه‌رگه‌ دێرینه‌کانی دێموکرات" به‌لای بۆرۆژهه‌ڵاته‌وه‌ ناسراون به‌ڵام له‌ پێوه‌ندیه‌کدا ئه‌ندامێکی ئه‌و ده‌سته‌یه‌ رایگه‌یاند که‌ "چونکه‌ تا ئێستا نه‌مانتوانیوه‌ کۆ بینه‌وه‌ و به‌ ره‌سمی ده‌سته‌ی به‌ڕێوه‌به‌ریی هه‌ڵبژێرین، نامانه‌وێ خۆمان بکه‌ین به‌ ده‌مراستی ئه‌ندامانی کۆمه‌ڵه‌ی پێشمه‌رگه‌ دێرینه‌کانی دێموکرات و له‌ داهاتوودا له‌م باره‌وه‌ راگه‌یاندنی زیاتر ده‌ده‌ین."

k.p.d.demukrat@gmail.com

-------
ئه‌وه‌ش ده‌قی راگه‌یه‌ندراوی کۆمه‌ڵه‌ی پێشمه‌رگه‌ دێرینه‌کانی دێموکرات:

گـه‌ر ده‌ڵێـــن ســــه‌رماوه‌زه‌و، ســــه‌رما ده‌له‌رزێنـێ دڵان
مـــــــن ده‌ڵێم گه‌رم و به ‌تینه، هـــــه‌ر به‌هـــاره بۆ گوڵان
به‌ڵگه‌شــــم رۆژی له‌دایكبــــوونی پێشـــــمه‌رگه‌ی گه‌له
گه‌ش ده‌كا سه‌دها هه‌زار دڵ وه‌ك گوڵی سه‌ر رووی چڵان

هاونیشتمانه‌ به‌ڕێزه‌کان
پێشمه‌رگه‌ شۆرشگێره‌کانی کوردستان
به‌ خۆشحاڵیه‌وه‌ راده‌گه‌یه‌نین که‌ بۆ رێزلێنان له خه‌بات و تێكۆشانی پاریزه‌رانی نیشتمان، ئیمه پۆلێك له پێشمه‌رگه دێرینه‌کانی حیزب بریارمان دا كه له‌ رۆژی پیرۆزی 26ی سه‌رماوه‌ز، که‌ له‌ مێژه‌ له‌ لایه‌ن حیزبه‌که‌مانه‌وه‌ وه‌ک رۆژی پێشمه‌رگه‌ی کوردستان نێودێر کراوه‌، دامه‌زرانی کۆمه‌ڵه‌ی پێشمه‌رگه‌ دێرینه‌کانی دێموکرات رابگه‌یه‌نین.
بێگومان له‌ ماوه‌ی ته‌مه‌نی شێست و سێ ساڵه‌ی حیزبی دێموکراتی کوردستان‌دا به‌ هه‌زاران که‌س له‌ رۆڵه‌کانی نیشتمان له‌ ریزه‌کانی هێزی پێشمه‌رگه‌ی ئه‌م حیزبه‌دا تێکۆشاون و چه‌ندین هه‌زار پێشمه‌رگه‌ و فیداکاری ئه‌م ئاو و خاکه‌ له‌م پێناوه‌دا گیانیان فیدای ئازادی و رزگاریی کوردستان کردووه‌ یان به‌شێک له‌ جه‌سته‌ی خۆیان به‌ سه‌ربه‌رزیی گه‌له‌که‌یان به‌خشیوه‌. کۆمه‌ڵه‌ی پێشمه‌رگه‌ دێرینه‌کانی کوردستان به‌ پێویستی ده‌زانێ له‌ رۆژی 26ی سه‌رماوه‌ز، رۆژی پیرۆزی پێشمه‌رگه‌دا، جارێکی تر سه‌ری رێز و نه‌وازش بۆ هاوڕێیانی شه‌هیدی خۆی دابنوێنێ و هیوای سه‌ربه‌رزی بۆ گیانبازانی رێگای کوردایه‌تی و ئاڵاهه‌ڵگرانی کۆماری کوردستان بخوازێ.
ئێمه‌، دامه‌زرێنه‌رانی کۆمه‌ڵه‌ی پێشمه‌رگه‌ دێرینه‌کانی دێموکرات به‌ سه‌رنجدان به‌ پڕش و بڵاویی ئه‌و تێکۆشه‌رانه‌ی که به‌شێک له‌ ته‌مه‌نیان‌ له‌ ریزه‌کانی ئه‌م حیزبه‌ بۆ شه‌کاندنه‌وه‌ی ئاڵای کۆماری کوردستان ته‌رخان کردووه‌، به‌ پێویستمان زانی له‌ ژێر ناوی ئه‌م کۆمه‌ڵه‌یه‌دا، کۆ ببینه‌وه‌ و هه‌روا بۆ خزمه‌ت به‌ ئامانجه‌ نه‌ته‌وایه‌تیه‌کانی گه‌له‌که‌مان به‌ یه‌که‌وه‌ تێبکۆشین.
ده‌سته‌ی دامه‌زرێنه‌ر تا ئێستا توانیویه‌تی ره‌شنووسی پێڕه‌و و پڕۆگرامی ناوخۆی کۆمه‌ڵه‌ بنوسێته‌وه‌ و چاوه‌روانی ره‌خسانی ده‌رفه‌تێک ده‌که‌ین تا بتوانین به‌ پێی ئیمکان، له‌ ده‌وری یه‌ک کۆبینه‌وه‌ و وێڕای په‌سه‌ندکردنی ئه‌م ره‌شنووسه‌ و دارشتنی به‌رنامه‌کانمان بۆ داهاتوو، ده‌سته‌ی به‌ڕێوه‌به‌ریی کۆمه‌ڵه‌ش هه‌ڵبژێرین. هه‌ر بۆیه‌ له‌و تێکۆشه‌رانه‌ی که‌ لانیکه‌م دوو ساڵ له‌ ریزه‌کانی هێزی پێشمه‌رگه‌ی حیزبی دێموکراتی کوردستاندا خه‌باتیان کردووه‌ و خۆیان وه‌فادار به‌ حیزبی دێموکراتی کوردستان و بنه‌ماکانی کۆماری کوردستان ده‌زانن، داوا ده‌که‌ین که‌ بۆ ئه‌ندام بوون له‌ رێکخراوه‌که‌ماندا، له‌ رێی ئیمه‌یلی k.p.d.demukrat@gmail.com پێوه‌ندیمان پێوه‌ بگرن تا به‌ یه‌که‌وه‌ بۆ به‌ره‌وپێش بردنی ئامانجه‌ نه‌ته‌وایه‌تیه‌کانمان تێبکۆشین و بۆ هه‌ر وا به‌رز راگرتن و شه‌کانه‌وه‌ی ئاڵای پیرۆزی کوردستان تێبکۆشین.
ده‌سته‌ی دامه‌زرێنه‌ری کۆمه‌ڵه‌ی پێشمه‌رگه‌ دێرینه‌کانی دێموکرات
26ی سه‌رماوه‌زی 1387ی هه‌تاوی . (له سایتی بو روژهه لات وه رگیراوه)